करोड नकमाएको फिल्म भेट्नुहोस्, पुरस्कार जित्नुहोस्

नेपाली फिल्म बनाउने निर्माताहरुले सधै नै स्किम दिएर दर्शकलाई हलसम्म तान्न खोज्छन् । कहिले कलाकारसँग डेटिङ, कहिले खाना खाने व्यवस्था यस्तै ।

तर, अब अर्को एउटा स्किम राखे पनि हुने । त्यो स्किम के भन्दा, करोड नकमाउने नेपाली फिल्म भेट्नुहोस् पुरस्कार लैजानुहोस् भनेर प्रतियोगीता गरे के होला ?

यो बर्ष त करोड क्लबमा पुग्ने फिल्मको भिड नै लागेको छ । भदौ १ गतेबाट चलेको ब्ल्याक फिल्मले पनि करोड ग्रस ३ दिनमै गर्यो रे । निर्माताले यही आँकडा दिएका छन् । त्यो भन्दा अगाडि भैरे फिल्मले पनि करोड कमायो । अभिनेता आर्यन सिग्देलको कायरा फिल्मले पनि करोड ग्रस गरेको थियो ।

शिल्पा पोखरेलको मुख्य भूमिका रहेको विराङ्गना फिल्मले पनि करोड कमायो भन्दै केक काटिएको थियो । बोबीले पनि करोड कमायो । कोहलपुर एक्सप्रेस, सुनकेशरी सबै फिल्मले करोड कमाए । करोड कमाउने फिल्मको त यति धेरै भिड लाग्यो कि, ४ महिनामै निर्माता मालामाल । अब, करोड नकमाउने फिल्म खोजेर पुरस्कार दिदा के होला ?