नेपाल स्रष्टा समाजद्वारा विभिन्न सम्मानहरूको घोषणा

Mero Film

नेपाल स्रष्टा समाजले सुभद्रा–विश्वराज स्रष्टा सम्मान, दमन्ता खनाल स्मृति नारी स्रष्टा सम्मान, प्रसिद्ध कँडेल स्मृति युवा स्रष्टा सम्मान गरी तीनवटा सम्मानहरू गर्ने भएको छ । भाद्र ३० गते सम्पन्न हुन लागेको आफ्नो साधारण सभाको दिन एक बेग्लै कार्यक्रमको आयोजना गरी उक्त सम्मान प्रदान गर्न लागिएको हो ।

सुभद्रा–विश्वराज स्रष्टा सम्मान यस वर्ष शास्त्रीय शैलीमा साहित्य रचना गर्ने तथा पर्याप्त मात्रामा साहित्य साधना भए तापनि अपेक्षित रूपमा ओझेलमा परेका साहित्यकार स्व. नारायणदत्त शास्त्रीलाई मरणोपरान्त प्रदान गरिने छ । दमन्ता खनाल स्मृति नारी स्रष्टा सम्मान लामो समयसम्म साहित्य र सञ्चारका क्षेत्रमा सक्रिय रहनुभएकी श्री सिर्जना शर्मालाई प्रदान गरिने छ । यसैगरी प्रसिद्ध कँडेल स्मृति युवा स्रष्टा सम्मान समकालीन पुस्ताका प्रखर युवा कवि श्री रमेश शुभेच्छुलाई प्रदान गरिने छ ।

प्रत्येक वर्ष प्रदान गरिने यी तीनवटै सम्मानहरू सम्मानपत्रसहित नगद रू. ११,१११ (एघार हजार एक सय एघार) राशिका छन् ।

सुभद्रा–विश्वराज स्रष्टा सम्मान गत वर्षबाट प्रदान गर्न सुरु गरिएको हो भने दमन्ता खनाल स्मृति नारी स्रष्टा सम्मान र प्रसिद्ध कँडेल स्मृति युवा स्रष्टा सम्मान यस वर्षबाट प्रदान गर्न लागिएको हो । सोही समारोहमा केही कृतिहरूको लोकार्पणसमेत गरिने समाजले बताएको छ ।

नेपाल स्रष्टा समाजले स्थापना गरेका योगमाया राष्ट्रिय नारी स्रष्टा सम्मान र योगमाया न्यौपाने अभियन्ता राष्ट्रिय सम्मान गत साउन ७ गते क्रमशः नीलम कार्की निहारिका र ज्ञानमणि नेपाललाई प्रदान गरिएको थियो ।

नेपाल स्रष्टा समाजले आफ्नो स्थापनाको दशौँ वर्ष पुरा गरेको छ । हाल समाजमा देशभित्र र बाहिर गरी एक सय साठी जना विभिन्न प्रकारका सदस्यहरू रहेका छन् । आगामी भाद्र ३० गते हुने साधारण सभामा नयाँ कार्यसमितिको निर्वाचनसमेत हुने समाजका अध्यक्ष पवन आलोकले बताए ।


Leave a Reply

Your email address will not be published.