ब्याडमिन्टन प्रतियोगितामा सीतेबा आयोजक, धुर्मुस सुन्तली भिड्दै

भद्रगोलका कालकार मधुसुदन पाठक ‘सीते बा’ ले तेस्रो संस्करणको योनेक्स सनराइज जेष्ट राष्ट्रिय खुल्ला ब्याडमिन्टन प्रतियोगिता गर्ने भएका छन् । पाठक अध्यक्ष रहेको जेष्ट ब्याडमिन्टन एकेडेमीले सोमबार पत्रकार सम्मेलन आयोजना गर्दै तेस्रो संस्करणको प्रतियोगिता असोज ३ गतेदेखि ७ गतेसम्म हुने जानकारी गराएको हो ।

ब्याटमिन्टनको उद्घाटन धुर्मुससुन्तली फाउण्डेसनका अध्यक्ष सीताराम कट्टेल र कुञ्जना घिमिरेले संयुक्त रुपमा गर्नुका साथै दुवै जनाले ब्याडमिण्टन खेल्ने पाठकले बताए । पत्रकार सम्मेलनमा बोल्दै सीतेबाले आफ्नो खेल प्रतिको रुची र प्रेमले प्रतियोगीताको आयोजना गरिएको जानकारी दिए । ब्याडमिण्टनको लोकप्रियता देशै भरी भएकोले स्वास्थ्यको हिसावले राम्रो हुनुका साथै अस्पताल अनावश्यक धाउनु पर्ने झन्झट घट्ने सीतेबाको भनाई रहेको छ ।

प्रतियोगिता असोज ३ गते एकेडेमीको हल बसुन्धरामा हुनेछ । यसपटक प्रतियोगितामा ९ विधा समावेश गरिएको छ । पुरुष युगल खुल्लालाई यसपटक प्रतियोगितामा समावेश गरिएको नेपाल राष्ट्रिय ब्याडमिन्टन टिमका मुख्य प्रशिक्षक तथा प्रतियोगिता संयोजक सुदिप योन्जनले जानकारी गराए । खेलका हरेक विधाका विजेताहरुलाई नगद राशी सहित प्रमाण पत्र प्रदान गरिने भएको छ । प्रतियोगिताको सम्पूर्ण तयारी पुरा भै सकेको छ ।