अभिषेकको स्केचमा ‘केकी अनि कला’

Mero Film

चैत २८, २०७६ शुक्रबार १४:१५

समय: लक डाउन

स्थान: दमक

छेउमा: सिसाकलम, पेपर, एक्रोलिक र क्यानभास

इच्छा: मन परेको पेन्टिङ, स्केच

सिसाकलमको मद्दतले सेतो पेपरमा भर्खरै स्केच तयारी गरिरहेका छन् उनी। कपाल, नाक अनि हसिँलो ओठ देखियो । स्केच गर्दा गर्दै हल्का अनुहारको आकृति दुरुस्तै देखियो । बल्ल चिनियो । ए ! यो त नेपाली फिल्मकी नायिका केकी अधिकारीको रहेछ ! छेउमै अर्को काजगमा कवि धनकुटेली कान्छाको स्केच पनि तयारी गरिसकेका छन् ।

लकडाउनको बेला चित्रकार, ग्राफिक डिजाइनर तथा स्टोरी कन्सेप्ट राइटर अभिषेक कुमार दास फुर्सदमा आफूलाई मन लागेका यस्तै कामहरु गर्दै समय बिताइरहेका छन् । उनी भन्छन्, “नेपाली फिल्म जगतमा बौद्धिक र राम्री नायिका केकी अधिकारी मलाई खुब मन पर्छ । त्यसैले उहाँको तस्बिरको स्केच बनाइरहेको छु” ।

खासमा उनी मोशन एक्ट इन्टेरियर डिजाइन स्टुडियोका क्रिएटिभ डिरेक्टर हुन् । लकडाउनले उनको काममा पनि असर गरेको छ । उनले चाहेको र खोजेको क्यानभास पाएका छैनन् भने रङगहरु पनि पाएका छैनन् । उनी भन्छन्, “अहिलेको बन्दाबन्दीमा क्यानभास लिन काठमाडौंमै जानुपर्छ । तर त्यहाँ त झन लकडाउन छ । कसरी जाने ? बचेको क्यानभासमा आफूलाई मन परेको चित्र बनाउँदै आएको छु । नभए पेन्सिलले सेतो पेपरमै पनि बनाएको छु, समय सदुपयोगका लागि” ।

उनले एक्रोलिक क्यानभासमा घोडाको चित्र समेत बनाएका छन् । यो उनले बचत भएको रङ र क्यानभासमा आफ्नो कला निखारेको हो ।

यस्तै लकडाउनको समयलाई सदुपयोग गर्दै उनले आफूले अध्ययन गरेको ललितकला क्याम्पसका प्रिन्सिपल विपिन घिमिरेको चित्र बनाएका छन्, उपहार दिनका लागि । उनी भन्छन्, “मैले सरलाई बर्थडे गिफ्टका लागि उहाँको फेसबुक प्रोफाइलबाट तस्बिर झिकेर स्केच तयार गरें । जन्मदिनको उपहारमा दिने सोच बनाएको छु” ।

यसका साथै अभिषेक र उनको श्रीमतीले साँझमा खाना पकाएर वालआश्रम वा वरीपरी भोकै रहेका बालबालिकालाई खाना खुवाउँदै आएको पनि बताए । उनले भने, कहिलेकाही “साँझमा यहाँ रहेका बालबालिकाहरुलाई खाना खुवाउँन जाने गरेको छु ।’