पल शाह प्रकरण: ‘बालिकाले सिकेको नराम्रो बानीको हामी सबै दोषी छौँ’ – दिपकराज गिरी

अभिनेता पल शाहविरुद्ध नाबालिग गायिकाले जबरजस्ती करणीको आरोपमा उजुरी दिएपछि उनले आफै आत्मसमर्पण गरेर तनहुँ पुगेका थिए । शाह अहिले प्रहरीको न्यायिक हिरासतमा रहेका छन् ।

पल शाह प्रकरणमा अझै पनि धेरै कलाकारहरु मुख खोल्न हिच्किचाइरहेका छन् । कलाकार, निर्देशक तथा निर्माता दिपकराज गिरी भने सामाजिक सञ्जालमा दिन दिनै जसो स्टाटस लेखेर आफ्नो भाव व्यक्त गरिरहेका छन् । गिरीले पीडित गायिकाप्रति सहानुभूति प्रकट गर्दै आफ्नो अभिव्यक्ति सार्वजनिक गरेका छन् ।

पल प्रकरण की पीडितले अहिले जे भोगिरहेकी छिन्, त्यसको दोषको भागीदार आफू लगायत मनोरञ्जन क्षेत्रका सबै व्यक्तिहरु रहेको बताएका हुन्। पीडित गायिकाको पक्ष लिए पनि गिरीले पीडित नाबालिगको नाम आफ्नो स्टाटसमा खुलाएका छन्।

उनले आफ्नो फिल्म छक्का पन्जामा अभिनय गराउँदा ताकाको अवस्था स्मरण गर्दै लामो स्ट्याटस लेखेर यो क्षेत्रमा ल्याएकोमा गर्व महसूस भएको उल्लेख गरेका छन् । तर, उनले ती गायिका पीडित हुनुमा कला क्षेत्रमा रहेका आफूहरू सबै दोषी हुनसक्ने संकेत गरेका छन् ।

गायिकालाई यहाँसम्म पुर्याएकोमा गर्व गर्ने क्षेत्रले उनले सिकेको नराम्रो बानीको ठेक्का लिने कि नलिने भन्दै प्रश्न उठाएका छन् । पीडितको यो क्षेत्रको यात्रालाई सरसर्ती लेख्दै उनको सफलतामा गौरव रहे पनि पीडामा दोषी महशुस गरेको बताएका छन्।

‘एउटा सामान्य बालिकालाई प्रोफेसनल कलाकारजस्तै बनाएर रातारात चर्चित बनाउने हामी सबैलाई एकमुष्ट बधाई र धन्यबाद छ !’ उनले लेखेका छन्, ‘तर, मिडियामा आए झैँ ब्वाइ फ्रेन्डहरू राख्ने, सम्बन्ध बनाउने, षड्यन्त्र नै गर्ने, नाबालिग भएर पनि यस्तो गर्ने, त्यतो गर्ने, यो चाहिँ उनले गाउँबाटै सिकेर आएकी थिइन् कि कसो ? यस्को जिम्मा चाहिँ हामीले लिने कि नलिने ?’

फिल्मको केही अंशमा विद्यार्थीको भूमिका चाहिँदा उनी पनि देखिएकी थिइन्। छक्का पञ्जा –३ को छायाँकनको लागि प्रयोग गरेको विद्यालयकी विद्यार्थी थिइन् पीडित किशोरी । त्यही बेलामा हो ‘छक्का पञ्जा’ खिच्न गएका छायाँकार पुरुषोत्तम प्रधानले उनले गीत गाएको भिडियो खिचेर फेसबुकमा हाले।

गिरिले पीडित गायिकाले आज जे भोगिरहेकि छिन् त्यसमा पनि कला क्षेत्र, यस क्षेत्रका व्यक्तिको संगत र यसको वातावरणको दोष छ कि छैन भन्दै प्रश्न गरेका छन् । उनले आफूले को दोषी, को निर्दोष भनेर फैसला गर्न काम आफ्नो नभएको उल्लेख गर्दै उनले पीडितलाई थप पीडा दिने अभिव्यक्ति नदिन आग्रह गरेका छन् ।

उनले पीडित गायिकाले भोगिरहेको नियतिमा आफू पनि दोषी रहेको देखिरहेको बताएका छन् । ‘उनले भोगिरहेको आजको नियतिमा आफूलाई पनि दोषी देखिरहेको छु’ उनले भनेका छन् ।

उनले बालिकालाई ‘सराप्न’ बन्द गर्न आग्रह गरेका छन् । ‘उनको प्रगतिमा गर्व गर्छु भने, उनले भोगेको नियतिमा आफूलाई दोषी देखिरहेको छु,’ दीपकले भनेका छन् ।

दिपकराज गिरीको फेसबुक स्टाटस जस्ताको तस्तै