फिल्म खेल्न किन डराउँछन् अनमोल ?

नायक अनमोल केसी निक्कै कम फिल्म खेल्ने कलाकार हुन् । उनले आफ्नो करिअरमा ८ वटा मात्र फिल्ममा अभिनय गरे । वर्षमा एउटा वा दुई वर्षमा एउटा मात्र फिल्म उनको रिलिज हुने गरेका छन् । अनमोल केसीलाई लिएर फिल्म बनाउन निर्माता त हानथाप गर्छन् । तर, उनलाई फिल्म खेलाउन सहज भने छैन ।

अनमोल बारम्बार भन्ने गर्छन्–‘दर्शकले मबाट धेरै अपेक्षा गरेका छन् । यसैले, म दर्शकको अपेक्ष पुरा गर्नका लागि पैसाको पछि लाग्दिनँ । आफूलाई चित्त नवुझेसम्म फिल्म साइन गर्दिनँ ।’

हुन पनि हो, अनमोलले फिल्म साइन गरेर पनि छाडेका केही उदाहरण छन् । ‘ए मेरो हजुर’को २ वटा सिरिजमा काम गरेका अनमोलको विगत ४ बर्षदेखि यही फिल्मले नै स्टारडम धानिदिएको छ । उसो भए के अनमोल फिल्म खेल्न डराउँछन् त ?

‘धुपौरे, ब्याचलर बन्टी, हनी बनी’ लगायतका फिल्म उनले साइन गरेर छाडे । अर्थात, अनमोल आफूले साइन गरेका फिल्म कमजोर बन्छन् या चल्देनन् कि भन्ने डरले बढी आक्रान्त छन् । यसैले, उनी हतपत्त फिल्म साइन नै गर्दैनन् । अनमोलले फिल्म साइन गर्ने वित्तिकै चलाउने जिम्मा उनको काँधमा जान्छ । यसैले, अनमोल केसी फिल्म साइन गर्न डराइरहेका छन् ।

‘ए मेरो हजुर ४’ रिलिज भएको ३ महिना भैसकेको छ । तर, अनमोलले नयाँ फिल्म साइन गरेका छैनन् । अनमोल आफैले पनि नयाँ फिल्म साइन नगरेको बताएका छन् । यसर्थ, यो बर्ष उनको नयाँ फिल्म आउँछ या आउँदैन पक्का छैन ।