अनमोललाई साइन गराउन राजनीतिक पावर लगाएका छैनौः पूजा शर्मा

Mero Film

नायिका पूजा शर्माले नायक अनमोल केसीलाई आफ्नो नयाँ फिल्ममा साइन गराउन राजनीतिक पावर प्रयोग गरिएको भन्ने खबरलाई वाहियात भनेकी छिन् । अनमोलले केही साता अगाडि मात्र सुदर्शन थापाको निर्देशन तथा पूजा शर्माको निर्माणमा बन्ने फिल्म साइन गरेका थिए ।

तर, केही मिडियामा भने पूजाले प्रेमी युद्ध बाँनियाको साथ लिएर अनमोललाई साइन गराउन इन्द्र बाँनियादेखि आरजु राणासम्मको पावर लगाएको भन्दै खबर सार्वजनिक भएको थियो । यो बिषयमा कुरा गर्दै पूजाले भनिन्–‘यी सबै वाहियात कुरा हुन् । अनमोल यही क्षेत्रमा विगत केही बर्षदेखि सक्रिय छन् । उनीसँग काम गर्नका लागि हामीले पहिलेदेखि नै कुरा गरिरहेका थियौं । यसपटक अनमोललाई कथा निक्कै मन पर्यो र उनी अनुवन्धित भएका हुन् ।’

पूजाले यस्ता खालका वाहियात खबरले कलाकारको काम गर्ने इच्छामा गिरावट आउने समेत बताइन् । उनले भनिन्–‘दुई वटा टिम मिलेर काम गर्दा फिल्म क्षेत्रलाई नै राम्रो हो । बलिउडमा पनि ठूला कम्पनीहरुले मिलेर काम गरेका छन् । तर, यहाँ त अरुको रिस र डाहा गरेर कसरी हुन्छ फाटो ल्याउने काम गरिन्छ । यसले, फिल्म क्षेत्रलाई अगाडि बढाउन मद्दत गर्दैन ।’

पूजा र अनमोलको मुख्य भूमिका रहने फिल्मको कथा यतिबेला धमाधम लेख्ने काम भैरहेको छ । फिल्मलाई कार्तिकबाट छायांकनमा लैजाने योजना टिमको छ ।


Leave a Reply

Your email address will not be published.