‘छड्के २’को मुहुर्तमा अनमोलको एउटा कुरा याद गर्नुभयो ?

यदि कलाकार देवु श्रेष्ठले दैनिक पोष्ट गर्ने भिडियोमा अनमोल केसीलाई देखाएनन् भने, उनको ‘छड्के २’को लुक्स निर्माणपक्षले चाहेको समयमा नै सार्वजनिक हुन्छ होला ।

चितवनबाट २ दिन अगाडि छायांकन सुरु गरिएको अनमोल केसी स्टारर फिल्मको अन्य कलाकारको नाम समेत सार्वजनिक गरिएको छैन । निगम श्रेष्ठको निर्देशनमा बनिरहेको फिल्मलाई चितवन र मुस्ताङमा खिचिनेछ ।

फिल्ममा अनमोलसँगै रविन तामाङ र कमलमणी नेपालले काम गर्दैछन् । छायांकन सेटबाट सार्वजनिक गरिएको एक तस्वीरमा अनमोल बाक्लो कपडामा देखिएका छन् । चितवनको चर्को गर्मीमा पनि अनमोलले बाक्लो कपडा लगाउनुले, फिल्ममा उनको भूमिका के होला भन्ने कौतुहलता आम दर्शकमाझ जाग्न सक्छ । यो फिल्मका लागि अनमोलले चितवनमै एक महिनादेखि वर्कशप समेत गरिरहेका थिए ।

काभ्रे फिल्मस्को व्यानरमा निर्माण भैरहेको फिल्ममा प्रशान्त गिरी र लक्ष्मण काफ्लेको लगानी छ । फिल्मलाई ६० दिन लगाएर खिचिने निर्माणपक्षले बताएको छ ।