माफी मागेर अनमोलले कमाएको वाहवाही

यो साता नायक अनमोल केसीका लागि सुखद रहेन । केसी अभिनित फिल्म ‘छड्के २’ले बक्स अफिसमा दर्शक बटुल्न सकेन । अनमोलले आफ्नो करिअरमा यति कमजोर व्यापार यसअघि देखेका थिएनन् । यसैले, पनि यसपटक अनमोलको स्टारडममाथि प्रश्न उठ्नु स्वभाविक नै हो । 

तर, फिल्म रिलिज भएको एक सातापछि अनमोलले आम दर्शकसँग माफी मागेका छन् । अनमोलले यसपटक आफूबाट गल्ती भएको भन्दै दर्शकलाई फिल्ममाफर्त सन्तुष्ट पार्न नसकेकोमा माफी मागेका हुन् । 

फिल्म चलेर असफल भएपछि कलाकारहरु त्यसलाई स्विकार गर्न सक्दैनन् । अझ, असफल फिल्मको जिम्मेवारी आफ्नो काँधमा लिन त उनीहरुको पसिना छुट्छ । तर, यसपटक अनमोलले सहजै आफ्नो गल्ती स्विकार गर्दै आउँदो प्रोजेक्टमा परिपक्क भएर फर्किने वाचा गरेका छन् । 

अनमोलले आफू फेरि शुन्यमा रहेको भन्दै आफ्नो् दशौं फिल्म सुरुवात हुने तर्क गरेका छन् । दर्शकलाई निराश बनाएकोमा माफी माग्दै अनमोलले परिपक्क हुनुपर्ने समयमा भुल भएको लेखेका छन् । 

अनमोलले सामाजिक संजालबाट गल्ती भएको भन्दै माफी मागेपछि सामाजिक संजालमा यसको चर्चा भैरहेको छ । अनमोलको चौतर्फी तारिफ समेत भैरहेको छ । 

अनमोल यसै अनमोल भएका होइनन् भन्दै उनको तारिफ गर्नेमा फिल्मीकर्मीदेखि संचारकर्मी र दर्शक छन् । 

पक्कै पनि कुनै कलाकारको करिअरमा सबै फिल्म हिट हुन्छ भन्ने हुँदैन । तर, कहिलेकाही असफलता भोग्दा त्यसलाई स्विकार गर्न सक्नु महानता हो । अनमोलले ‘छड्के २’ असफल भएपछि त्यो महानता देखाएका छन् ।