इलामबाट उप–निर्वाचन लड्दै एलिजा गौतम

नेकपा एमालेका नेता सुवासचन्द्र नेम्वाङको निधन भएपछि इलाम क्षेत्र नम्बर २ मा उप–निर्वाचन हुने भएको छ । इलामको क्षेत्र नम्बर २ बाट नेम्वाङले प्रतिनिधि सभामा जित हासिल गरेका थिए । तर, उनको निधन भएपछि अहिले उक्त स्थान रिक्त भएको छ । 

निर्वाचन आयोगले केही महिनामा नै यो क्षेत्रमा उप–निर्वाचन गर्ने तयारी गरेको छ । अब, यो क्षेत्रबाट कलाकार तथा नेतृ एलिजा गौतमले उम्मेदवारी दिने भएकी छिन् । मेरो फिल्मसँग कुरा गर्दै एलिजाले भनिन्–‘म यो क्षेत्रबाट निर्वाचन लड्ने पक्का जस्तै छ । यसका लागि एक मुख्य पार्टीसँग कुरा पनि भैसकेको छ । चाडै नै पार्टी प्रवेश गरेर आफ्नो उम्मेदवारी घोषणा गर्छु ।’

एलिजाले अहिले नै कुन पार्टीमा प्रवेश गर्न लागेको हो, त्यसको नाम भने खुलाइनन् । तर, इलामको क्षेत्र नम्बर २ बाट आफूले निर्वाचन लड्ने पक्का भएको उनले जानकारी दिइन् । 

एलिजा राजनीतिमा सक्रिय हुने कोशिशमा लागेको केही समय भइसकेको छ । उनले, केही महिना अगाडि नागरिक उन्मुक्ति पार्टी छाडेर स्वतन्त्र रुपमा राजनीति गर्ने बताएकी थिइन् । तर, अब उनी देशको मुख्य एक पार्टीबाट निर्वाचन लड्ने तयारीमा लागेकी छिन् । 

एक फिल्म र केही म्युजिक भिडियोमा काम गरेकी एलिजा राष्ट्रिय राजनीतिमा आउनका लागि फेरि तयार भएकी छिन् ।