‘माइतीघर’को मुख्य भूमिकामा उपासना

रोहित अधिकारीको निर्माणमा तयार हुन लागेको फिल्म ‘माइतीघर’का लागि मुख्य नायिका फाइनल गरिएको छ । यो फिल्मको मुख्य नायिकामा उपासना सिंह ठकुरीलाई अनुबन्धित गरिएको निर्माणपक्षले बताएको छ । 

निर्माता रोहित अधिकारीले फिल्ममा कलाकारको रुपमा केदार घिमिरे र उपासनालाई साइन गरिएको पुष्टि गरे । उनका अनुसार, फिल्ममा अन्य नाम चलेका कलाकारहरुको अभिनय रहनेछ । उनीहरूसँग कागजी संझौता भएपछि नाम सार्वजनिक गर्ने रोहितले बताए । 

रामशरण पाठकको लेखन रहेको फिल्ममा रविन शेरचन र धिरज तामाङको लगानी रहनेछ । फिल्ममा चन्द्रकुमार दोङ र ईश्वर श्रेष्ठ कार्यकारी निर्माताको रुपमा छन् । 

उपासनाको यो वर्ष फिल्म ‘खुस्मा’ले बक्स अफिसमा सुखद कमाई गर्यो । यसपछि, उपासनाको माग फिल्म क्षेत्रमा फेरि बढेको छ । ‘माइतीघर’मा उपासना गाउँकी एक युवतीको भूमिकामा देखिदैछिन् ।

मिलन तामाङको निर्देशनमा तयार हुन लागेको फिल्मको छायांकन केही महिनामा सुरु हुनेछ । फिल्मलाई आउँदो बर्षको दशैंको फूलपातिबाट रिलिज गर्ने घोषणा निर्माणपक्षले गरिसकेको छ ।