सञ्जु : खराब मान्छेमाथि बनेको असल फिल्म (समीक्षा)
![](https://snowberry.prixacdn.net/media/gallery_folder/dscvidhzowrjsfceqqcr4ryakjw6wbgfcftjromwbzwcnj8jxfislmuuexye_v3pI14gstn_3ylgl83631o57xxszpahowel3ei3ge6oywcqjkphox7fzqonav1rauguf06d.jpg)
बायोपिक भनेर हेर्दा फिल्म धेरैलाई अपुरो लाग्छ तर आफैंमा यसलाई फिल्म मात्र सम्झेर हेर्ने हो भने चैं बलिउडमा यो साल रिलिज भएका उत्कृष्ट फिल्ममध्ये एक हो । निर्देशक, पटकथा र कलाकारको अभिनयले हिरानीले फेरि बलिउडमा हलचल ल्याउन सफल भएका छन् ।
सामाजिक विषयलाई मनोरञ्जक हिसाबले प्रस्तुत गर्ने मामलामा राजकुमार हिरानी बलिउडमा नामुद निर्देशक मानिन्छन् । उनका अघिल्ला फिल्म मुन्नाभाइ एमबिबिएस, लगे रहो मुन्ना भाई,थ्रि इडियटस्, पिके सबैमा कुन न कुनै सामाजिक बिसंगतिलाई फिल्मको विषय बनाएका थिए । उनका फिल्ममा देखिने थप अर्को विशेषता हो उनका फिल्ममा बाबु छोरा र साथीबीचको सम्बन्धले विशेष स्थान पाउँछन् ।
हिरानी यो पटक बायोपिक लिएर निस्किएका छन् तर यहाँ पनि उनले सम्बन्धको सिग्नेचर छाडेका छैनन् । बलिउडका विवादित सुपरस्टार सञ्जय दत्तको जीवनी भन्न हिडेका हिरानीले यसलाई पनि बाबु छोराको सम्बन्धको कथामा रुपान्तरण गरिदिएका छन् । हिरानीको पछिल्लो फिल्म ‘सञ्जु’ सञ्जय दत्तको जीवनी कम बाबु छोराको सम्बन्धको कथा ज्यादा लाग्छ । अब सुनिल दत्त र सञ्जय दत्तको सम्बन्ध फिल्ममा देखाए झैं थियो कि थिएन, यो त कि स्वयं सञ्जय दत्त जान्दछन् कि हिरानी । तर फिल्म हेर्दा चैं यही लाग्छ ।
फिल्ममा बाबु छोरासँगै दोस्रो कथा छ, सञ्जय दत्तको हतियार सम्बन्धी । अवैधानिक हतियार राखेको अभियोगमा ५ वर्ष जेल बिताएका सञ्जय दत्त कसरी यसको चक्करमा परे, फिल्मको सबप्लट दर्शकलाई यही सत्य बताउनमा केन्द्रित छ ।
फिल्मको सुरुवात हुन्छ सञ्जय दत्तको बायोग्राफी लेखाउने चाहानाबाट । अदालतले ५ वर्षको जेल सजाय सुनाएपछि सञ्जय दत्तसँग १ महिनाको समय छ । अदालतले फिल्मको काम सक्नका लागि दिएको १ महिना । यही समयमा दत्त आफ्नो कथा दुनियाँलाई सुनाउन चाहान्छन् । उनको यही चाहानालाई मध्य नजर गर्दै एक लेखकले दत्तको बायोग्राफी पनि लेखेका छन् तर समस्या के भइदिन्छ भने उनले दत्तलाई महात्मा गान्धीसँग तुलना गरिदिन्छन् । दत्तलाई बायोग्राफी चित्त बुझ्दैन । उनले छापिएका सबै किताब जलाउँछन् । हिरानीले पहिलो दृश्यबाटै दत्त सनकी र जिद्धी भए पनि इमान्दार भएको स्थापित गरिदिएका छन् ।
दत्तको बायोग्राफी लेखाउने चाहानासँगै कथामा प्रवेश हुन्छ, विनी (अनुष्का शर्मा)को लण्डन बसेर किताब लेख्ने गर्छिन् । पहिला त विनी दत्तको बायोग्राफी लेख्न तयार हुन्न तर दत्तको कथा सुनेपछि विनीले बायोग्राफी लेख्ने निर्णय गर्छे । फिल्मको पहिलो हाफ दत्तले विनीलाई सुनाएको कथामा आधारित छ । यो भागमा निर्देशकले ड्रग्सको दुनियाँमा दत्तको प्रवेश, यसबाट छुट्न गरेको प्रयास र यही आदतका कारण गुमेका सम्बन्धलाई रोलर कोस्टर बनाएर प्रस्तुत गरेका छन् । पहिलो भाग समेट्ने यी कथामा हिरानीले आफ्नो सारा कौसल प्रयोग गरेका छन् । हाँस्दाहास्दै रुवाउँछन्, रुवाउँदा रुवाउँदै हसाउँछन् ।
फिल्मको दोस्रो भाग दत्तको हतियार काण्डमा केन्द्रित छ । अनुमतिबिना हतियार राखेको अभियोगमा दत्तले सन् २०१३ मा भारतको उच्च उदालतबाट ५ वर्षको जेल सजाए पाएका थिए जुन उनले २०१६ मा सकाएका हुन् । तर दत्तको अपराध अवैधानिक हतियार राखेको मात्र भए पनि सन् १९९३ मा मुम्बई २ सय ५० जनाको ज्यान जाने गरी भएको बम ब्लास्टमा पनि उनको हात रहेको मिडियाको आरोप छ । फिल्मको दोस्रो भागले दत्तको जेल जीवन र उनलाई छुटाउन बाबु सुनिल दत्तले गरेको संघर्षलाई बुनेको छ । पहिलो भाग झैं दोस्रो भाग दर्शकका लागि उत्ति रोमाञ्चक छैन, तर त्यसका बावजुद पनि हिरानीले कथालाई बोरिंग तरिकाले वाचन गरेका छैनन् । दोस्रो भागमा पनि केही यस्ता ठाउँ त आइहाल्छन् जहाँ तपाईं आँखाको डिलसम्म आउने आँशु रोक्न सक्नुहुन्न । पहिलो भागमा त यस्ता ठाउँ धेरै नै छन् ।
बायोपिकमा फिल्म बनाउनु फिल्ममेकरका लागि जहिलै अपजसको काम हो । लामो जीवनकथालाई दुई घन्टा छेऊछाउमा समेट्नु जस्तो सुकै फिल्ममेकरको पनि अग्निपरिक्षा हो । अझ सञ्जय दत्त जस्तो लथालिंग जीवन बिताएको मान्छेको त के राख्ने र के छाड्ने दुविधा हुन्छ । हिरानीले पनि उनको बायोपिक बनाउँदा धेरै कुरा छुटाएका छन् । तर जति राखेका छन् तिनलाई न्याय गरेका छन् । ड्रग्स, स्टारडम, केटी, जेल सञ्जय दत्तको जीवनसँग जोडिएका पाटा हुन् तर निर्देशकले ड्रग्स र जेल जीवन छाडेर बाँकी सबै कुरा फिल्मबाट हटाइदिएका छन् । योसँगै धेरैले हिरानीलाई आरोप पनि लगाएका छन् कि सञ्जय दत्त साथी भएका कारण उनले दत्तलाई चोख्याउने गरी फिल्म बनाएका छन् । यो आरोपमा आंशिक सत्यता छ ।
पूरा फिल्म हेरिसक्दा लाग्छ हिरानीले यो फिल्म सञ्जयलाई आतंकवादी थिएनन् भनेर प्रमाणित गर्न बनाएका हुन् । फिल्मले भन्छ, दत्तलाई आतंकवादीे मिडियाले बनाएका हुन् । बायोपिक भनेर हेर्दा फिल्म धेरैलाई अपुरो लाग्छ तर आफैंमा यसलाई फिल्म मात्र सम्झेर हेर्ने हो भने चैं बलिउडमा यो साल रिलिज भएका उत्कृष्ट फिल्ममध्ये एक हो । निर्देशक, पटकथा र कलाकारको अभिनयले हिरानीले फेरि बलिउडमा हलचल ल्याउन सफल भएका छन् ।
सञ्जुको सबैभन्दा उल्लेखनीय पाटो कलाकारको अभिनय हो । सानोदेखि मुख्य भूमिकामा अभिनय गर्ने हरेक कलाकारको जीवन्त अभिनयले फिल्म उत्कृष्ट बनाउन मद्धत गरेको छ । तर पनि सञ्जय दत्तको रुपमा अभिनय गरेका रनवीर कपुर फिल्मका ज्यान हुन् । सञ्जय दत्तको रुपमा रनवीरको टान्सफर्मेसनले धेरैलाई चकित बनाउँछ । यो फिल्मसँगै रनवीरले अभिनयमा आफ्नो गुमेको लय पाएका छन् । रनवीरले फेरि एक पटक आफू बलिउडका सबैभन्दा कुशल अभिनेता भएको प्रमाणित गरेका छन् ।
फिल्ममा रनवीरपछि अभिनयले कायल पार्नेमा विक्की कौसलको पनि नाम आउँछ । रनवीरको साथी कमलीको रुपमा अभिनय गरेका उनले पनि फिल्ममा गज्जबको अभिनय गरेका छन् । फिल्ममा रनवीरपछि सुनिल दत्त बनेका परेश रावलको भूमिका बलियो छ । तर उनले तुलनात्मक रुपमा बाँकी कलाकारभन्दा कमजोर अभिनय गरेका छन् । सानो भूमिकामा देखिए पनि मनीषा कोइराला र अनुष्का शर्माले छाप छोडछन् ।
ऋभिजात जोशीसँग मिलेर हिरानीले लेखेको पटकथा फिल्मको सशक्त पाटो हो । आफ्नो हरेक फिल्ममा दर्शकका लागि जीवन जिउने सूत्र देखाउने हिरानीले यो पाली हिरानीले गीतलाई यसको माध्यम बनाएका छन् । बायोपिक भए पनि फिल्म कुनै सामाजिक विषयमा बनेको फेमिली ड्रामा झैं छ, यसका लागि हिरानीको जति तारिफ गरे पनि कम हुन्छ । धेरैले आरोप लगाए झैं उनले दत्तको जीवनीका राम्रा कुरा मात्र देखाएका छैनन्, उनको चरित्रका ब्ल्याक स्पटलाई दर्शकसामु पस्किएका छन् ।
फिल्मको एक दृश्यमा सुनिल दत्त बनेको परेश रावल एक पत्रिकाका सम्पादकलाई भन्छन्, ‘ सञ्जु कुनै बितेको समय हैन, जो फर्केर आउन सक्दैन ।’ यो स्टेटमेन्ट स्वयं सञ्जय दत्तको जीवनमा त लागू भएको छ नै, उनको भूमिका निभाउने रनवीर कपुरको जीवनमा पनि लागु हुन्छ । एकसेएक फिल्म फ्लप भएका कारण करिअरको उत्तराद्र्धमा रहेको टिप्पणी हुन थालेका रनवीर पनि सञ्जुसँगै लयमा फर्किएका छन् । सञ्जु खराब मान्छेमाथि बनेको असल फिल्म हो ।
![‘जुलुङ्गो’, ‘नो स्कुल टुडे’ र ‘ललित’ पुरस्कृत](https://snowberry.prixacdn.net/media/gallery_folder/merofilm-10_sUPBnSRFnK_jyvwj0wrrgjclbr4evjwkxyw0tlceytelgdjjfdhklnhqkx8mdszvhswbitz_qUlGwlsExQ_5n43eptoevct2zdodu3rlwqupejc2lmw7gzyoqxpt773hg53fgqi1j99tumc.jpg)
‘जुलुङ्गो’, ‘नो स्कुल टुडे’ र ‘ललित’ पुरस्कृत
![अनुपको फिल्म ‘पुरानो बुलेट’ युट्युबको ट्रेन्डिङमा](https://snowberry.prixacdn.net/media/gallery_folder/purano-bullet-makalu-khabar_acy7w9Q73C_dqfidq4tz13y95vvj0tuaabwiyfign3klyeoy5nta6dhwbydwpkyvsozqmbl_8hgYqjvaSp_afv9hcdg29zffjwj9fdadevfifq9swl41ohvw0ztxh8gdtgj6e6axpibssim.jpg)
अनुपको फिल्म ‘पुरानो बुलेट’ युट्युबको ट्रेन्डिङमा
![बलिउड फिल्म ‘सूर्यवंशी’ले दिएको हौसला !](https://snowberry.prixacdn.net/media/gallery_folder/suryabanshi-1-1_J9q9TAMt8C_f8qbuxzvxjxkcf5fsrtxfwfknsjtma86pqzng6n7c1tzg4awl5vt3a4hcsik_tPcDBI8fNF_vqsmnurrl4htixjl39zlakggkbucyjuv40cq0mpn4qt0on9w2hxywwmyz00n.jpg)
बलिउड फिल्म ‘सूर्यवंशी’ले दिएको हौसला !
![फिल्म तीन दिनमा कति कमायो ?](https://snowberry.prixacdn.net/media/gallery_folder/suryabanshi-1_eANl04ADgF_q51ytdbzm3jepxrbtvl29amdwoflbcuq7r0xo6rmwvxjq6s8ctcqot3ncfcy_klxsZjEjHO_0i3qo7nczjnbpj6tuaezrfjvomlqn3zowqbovz8rk47v6ykaerl4wyvmddyw.jpg)
फिल्म तीन दिनमा कति कमायो ?
![बादी महिलामा समर्पित वृत्तचित्र ‘निलो आकाश’](https://snowberry.prixacdn.net/media/gallery_folder/Capture-1-1_HJ9t1o9Ipo_cjxg2hzpxltldwnezjrm1hsnixqm6qhm9zyofthbnrnicyuscdn5hmldgr2b_eqXS2iZkTr_gju1ipvjkx3zqrdhxrraiwcgmbirrtzbraoyw4ko8wv5oja5vysfcetrokzv.jpg)
बादी महिलामा समर्पित वृत्तचित्र ‘निलो आकाश’
![फिल्म ‘जुलुङ्गोे’लाई युनिसेफको आइरिस अवार्ड](https://snowberry.prixacdn.net/media/gallery_folder/Scarecrow_A3rg7ZXwJm_CFKohDEnue_nbisnttp9n8if6tlqs8nd5qvw652n2rsc0aavamfzcl0wto6iauqtq37a6br_VRfc6rAdzO_rninkywrhbemta6kzlhxm0f6byadues9bhpoyvzal61xog0r6pdrz88u0tzw.jpg)
फिल्म ‘जुलुङ्गोे’लाई युनिसेफको आइरिस अवार्ड
![‘आमा’ मा नारी बिद्रोह](https://snowberry.prixacdn.net/media/gallery_folder/aama-banner_T4FREnJg45_eaysuit2jsitr6x3fhwoeicchrzttzey03bjyhf7e9u1189kkpct4hagjafk_poZJCOX2hZ_b57g9mpjwumohtdzq7cmwaddzrelyjoeipr0wl0dxpn1vwzcuminbr8gzoys.jpg)
‘आमा’ मा नारी बिद्रोह
![‘बागी ३’ : स्तरीय एक्सन, कमजोर कथा](https://snowberry.prixacdn.net/media/gallery_folder/BAAGI_nIH6OQiJL1_5cpz3nvlexuigroxyspkpd7basrkvsda3icm19u5uqvivlppjchg96xsg4zn_UhLVYDx5lx_u0ke4qnskdcnqgjebrx5d0pkp6j2vdgrjntnml73npouiova2szo0vd0tpxq.jpg)
प्रतिक्रिया